banner10.jpg

Berriak

"Gure ostalaritzan, Basque Wine", ostalaritzak Euskadiko kalitatezko edariei laguntzeko programa

Bizkai, Gipuzkoa eta Arabako Ostalaritza Elkarteek, (AHB, AEHG, SEA Hostelería eta GasteizOn), Eusko Jaurlaritzarekin batera (eta, horren izenean, HAZI Fundazioa), hitzarmen bat sinatu dute “Basque Wine” kontzeptuan bildutako Euskadiko edariak sustatzeko, lankidetzaren bidez pandemiak bereziki eragin duen bi sektoreri laguntzeko: Euskadiko ostalaritza eta upategiak. Lankidetza hori “Gure Ostalaritzan, Basque Wine” programarekin bat egin nahi duten ostalarien atxikimenduarekin gauzatzen da.

Borondatezko parte hartze horrekin, beren establezimenduetan Euskadin ekoizten diren kalitatezko edarien gama osoa eskaintzeko konpromisoa onartzen dute. Trukean, hainbat pizgarri jasoko dituzte: markaren promozio opariak, produktuaren zati bat doan edo edariak erosteko deskontuak.

“Basque Wine” Eusko Jaurlaritzak bultzatutako promozio marka bat da, Euskadin egiten diren ardo, sagardo eta artisau garagardoak merkaturatzeko bide berriak bilatzeko. Ildo horretan, ostalaritza oso kanal garrantzitsua da, beste batzuen aurrean uzta propioko produktuen salmenta lehenesten badu.

Programa uztailaren 1etik aurrera hasiko da eta hainbat hilabetez egongo da martxan. Denbora horretan, asmoa da produktu horiek merkaturatzeko garaian leialtasuna bultzatzea, hori onuragarria izango baita ostalaritzarentzat, Euskadiko upategientzat eta establezimenduetara hurbiltzen diren kontsumitzaileentzat.

“Basque Wine” markak babestutako edariak

“Basque Wine” kontzeptuan onartutako edariak Jatorri Izendapen eta marka kolektibo hauek bermatzen dituztenak dira:

Rioja JIK duen ardoa:

Euskal Autonomia Erkidegoan elaborazio, ontze eta botilaratze prozesuak burutu dituztenak, gutxienez %85 Arabako Errioxan ekoitzitako mahatsez eginda, eta etiketan hala zehazten dutenak (adibidez, Eskualdeko Ardoa, Udalerriko Ardoa edo Mahasti Berezia).

Txakolina

“Arabako Txakolina”, “Bizkaiko Txakolina” eta “Getariako Txakolina” Jatorri Izendapenek babestutakoak.

Garagardoa

“Basque Beer” artisau garagardoen marka kolektiboa Sagardoa “Euskal Sagardoa” sagardoaren Jatorri Izendapenak babestutakoak

INFORMAZIO GEHIAGORAKO: Ángel Rocha: 607 52 15 42

HAZIk esperienzia berritzaileak aurkeztuko ditu Food For Future azokan

HAZIk 80 metro karrakuto stand bat izango du Food For Future azokan, Euskadiko elikaduraren eta egurraren balio-katean aurrera eramaten ari diren esperientzia berritzaileak ezagutarazteko. Espazioa hiru eremutan banatuta dago, honako gai hauen arabera: trazabilitatea/segurtasuna, teledetekzioa eta jasangarritasuna/bizi-kalitatea/prozesuen hobekuntza.

Gai horien artean benetako proiektuak izango dira protagonista, horiek zuzenean erakutsiko baitira standean; besteak beste, honako proiektu hauek:

  • E-gazta: gazten prozesua digitalizatzea, elaborazio-prozesurako teknologia erabiltzearen zapore tradizionala alde batera utzi gabe.
  • Kiwi: sentsoreen bidez ureztatzea automatizatzea.
  • Doitasunezko nekazaritza. GPS, satelite-irudiak eta baliabidea optimizatzeko sentsoreak.
  • NPBko monitorizazioa. Laguntza-eskaerak egiaztatzeko satelite-irudiak erabiltzea
  • Arrainaren eta haragiaren blockchain, produktu horien trazabilitatea kontsumitzailearenganaino errazten duena

HAZI digitalizazio adimentsua bultzatzen ari da, ekoizleen bizi-kalitatea hobetzeko eta sektoreko lehiakortasuna eta ekoizpen-prozesuak handitzeko, baliabide gutxiago erabiliz.

 

HAZI, THE FOOD GLOBAL ECOSYSTEM ekimenaren eragile koordinatzailea eta katalizatzailea

The Food Global Ecosystem 60 enpresa inguruk osatutako proiektu publiko-pribatua da. Proiektu horren bidez, Euskadik berrikuntza-proiektuak, talentu ekintzailea eta startup-ak erakarri nahi ditu nekazaritzako eta elikagaien esparruko alderdi teknologikoetan (agritech, foodtech eta gastronomytech).

Euskadik aurkeztutako ekonomia Berreskuratu eta Eraldatzeko Proiektu Estrategiko (PERTE) honek mota guztietako enpresak biltzen ditu, izaera, hedadura geografikoa eta jarduera-azpisektorea kontuan hartuta; esnetarako, arrantzarako, haragitarako, landareetarako eta barazkietarako hornidura-kateak, bai eta ekipamendu-ondasunen fabrikatzaileak ere.

Ekosistemak EAEko zein EAEtik kanpoko 60 enpresa inguru biltzen ditu, eta Euskadiko elikadura katearen ikerketa, berrikuntza eta digitalizazioa bultzatzeko aktiboen eta zerbitzuen sarea izango du; HAZI, ekimenaren eragile koordinatzailea eta katalizatzailea, NEIKER, nekazaritza arloko proiektuen ikerketa zentroa, AZTI, ikerketa proiektuen eta elikadura teknologiaren sorkuntzaren eragile gisa, eta BASQUE CULINARY CENTER, talentua eta elikaduraren arloko ekintzaileak erakartzeko eragile nagusia eta gastronomiaren eremuko ekintzaileak. Era berean, ekosistemak Euskadiko Zientzia eta Teknologiaren Euskal Sarearen laguntza izango du.

Informazio gehiago

Euskal Gatza sortu da, Eusko Label duen Euskadiko kalitate handiko gatza

Eusko Label produktuen familian sartuko da gaurtik aurrera Euskal Gatza. Kalitate handiko gatza da, modu jasangarrian eta artisau eran ekoitzi, sailkatu eta ontziratua, Euskal Autonomia Erkidegoan. Euskal Gatzarekin, Añanako Gatz Haraneko (Araba) eta Leintz Gatzagako (Gipuzkoa) ur gaziko iturburuetan ekoizten den gatza ziurtatzen da. Bi gatz-enpresek 150 tona iturburu eta 20 tona gatz ekoitzi zituzten iaz eta etorkizunean handitu daiteke ekoizpena, merkatu-eskariaren arabera.

Goizean aurkeztu da, Añanako Gatz Haranean, Eusko Label duen Euskadiko Iturburuko Gatza – Euskal Gatza. Ekitaldian izan dira Bittor Oroz, Eusko Jaurlaritzako Nekazaritzako, Arrantzako eta Elikagai Politikako sailburuordea; Peli Manterola, HAZIko zuzendaria; Pablo de Oraa, Añanako Gatz Haraneko kudeatzailea; eta Beñat Agirreurreta, Leintz Gatzagako Udaleko kultura zinegotzia.

Gatza gozagarri gastronomiko zaharrenetako bat da, eta gizakiarentzat jangarria den harri bakarra. Duela 200 milioi urte gaur egun Euskadi dena estaltzen zuen itsaso zahar bat da gaur egun gatza ateratzeko erabiltzen ditugun ur gaziko iturburuen jatorria.  Historia horri eta produktu zoragarri hau ateratzen duten gatz egileen lanari esker lortzen Eusko Label duen Euskadiko Iturburuko Gatza – Euskal Gatza, azkar disolbatzen den purutasun eta kalitate handiko gatza.  

Identifikazioa eta produktuaren ezaugarriak

Euskal Gatza hainbat aurkezpen formatutan aurki daiteke merkatuan, hala nola kristalezko potoetan eta kartoizko ontzietan, guztiak Eusko Label zigilua duen kontrol etiketarekin identifikatuta. Beste gozagarri batzuk (adibidez, baratxuria, pipermina, kaiena eta belar proventzalak) dituzten hainbat elaboratu ere badaude. Produktuaren ezaugarriak Euska Gatzak ez du inolako tratamendu fisiko edo kimikorik (hala nola fintzeak edo garbiketak), ezta gehigarririk eta trinkotzearen kontrako produkturik ere. Kolore zuri garbiko gatza da, apur bat hezea, testura leun eta disoluzio errazekoa, ahoko zaporearen iraunkortasun ertaina duena.

ARGAZKIAK IKUSI

HAZI ziurtapen organoak ezarriko ditu Euskal Gatzaren prozesu katean (ekoiztea, kontserbatzea eta biltegiratzea, garraiatzea eta manipulatzea eta merkaturatzea) beharrezkotzat jotzen diren kontrol sistemak, Eusko Label bereizgarriarekin identifikatuta iristen den produktuak kalitate baldintza guztiak betetzen dituela ziurtatzeko.

Ekoizpen sistema tradizionala, artisau erakoa eta jasangarria

Eusko Label duen Euskadiko Iturburuko Gatza - Euskal Gatza ingurunearekin iraunkorra den kalitate handiko ekoizpen sistema baten bidez lortzen da. Gainera, bi gatzagetan, mendeetan zehar garatu duten elaborazio modu tradizionalari eusten zaio. Añanako Gatz Haranean eguzkia eta haizea erabiltzen dira gatzaren kristalizazio prozesuan, eta Leintz Gatzagan, berriz, bertako basoetako egurrekin egindako sua. Horrela, kalitate handiko produktu osasungarri eta jasangarria lortzeaz gain, aurrera egiten da paisaiaren, landa ingurunearen eta gure tradizioen kontserbazioan.

Euskal Gatzaren gatzuna energia berriztagarriak erabiliz lurruntzen da, eta eskuz biltzen eta ontziratzen da. Eusko Label produktuen familia Euskal Gatza Eusko Label markara gehituta, dagoeneko Euskadiko goi mailako 18 produktu daude bereizgarri horrekin ziurtatuta, “Eusko Labelekin egindako” produktuez gain. Eusko Labelen helburua da kontsumitzaileari kalitate maila zorrotza bermatzea, produktuen jatorria eta benetakotasuna segurtasun osoz identifikatzeko aukera ematea eta Euskadiko ekoizleen lana defendatzea eta sustatzea. 

Eusko Label produktuak: Euskal Okela, Euskal Baserriko Oilaskoa, Euskal Esne Bildotsa, Baserriko Txerria, Hegaluzea eta Hegalaburra, Euskal Baserriko Arrautza, Euskal Esnea, Eztia, Arabako Patata, Gernikako Piperra, Euskal Tomatea, Euskal Barazkiak, Ibarrako Piparrak, Euskal Egoskariak, Oliba Olioa Birjina Estra, Arabako Aleak, Antxoa eta Euskadiko Iturburuko Gatza.

Eusko Labelekin egindako produktuak: Eusko Label ia produktu guztiek dituzte beren elaboratuak, baina HAZIk aurkeztutako azken produktuak nabarmenduko ditugu: Euskal Ogia eta Euskal Gaztak.

2021rako Prestakuntza-beharrak helarazteko epea zabalik da

HAZIk hurrengo seihilabeteko (2021ko uztaila-abendua) formakuntza-eskaintza lantzen hasi da. Diseinu fase honetan ezinbestekoa da ikastaroetan parte hartu nahi duten pertsonen formakuntza-beharrak ezagutzea, lehen sektorearentzat eta kate osoarentzat baliagarri izan daitezkeen edukiak eskaini ahal izateko.

Horretarako, formulario bat jarri dugu beharren bat bidali nahi duen ororen eskura. Proposamenak jasotzeko epea ekainaren 18 arte egongo da zabalik.

  • ZER: Lehen sektore eta kate osoko formakuntza-beharrak
  • ZERTARAKO: 2020.ko bigarren seihilabeteko formakuntza-eskaintza lantzeko
  • EPEA: Ekainak 18
  • NOLA: Inprimaki honen bidez.

‘Eneko eta Ixabel goi-mailako produktuen lurraldean’ komikiaren aurkezpena

Bikainak enpresa elkarteak, HAZIrekin eta Eusko Jaurlaritzako Nekazaritza, Arrantza eta Elikagai Politikako Sailburuordetzarekin lankidetzan, 'Eneko eta Ixabel goi-mailako produktuen lurraldean' komikia aurkeztu du gaur. Ilustratutako 24 orrialdeetan, Eneko eta Ixabel Euskadi osoan zehar ibiliko dira, Eusko Label kalitate ikurra duten produktuen ekoizpenean lan egiten duten 9 enpresaren egoitzak bisitatzeko.

Bidaian, enpresa horiek kalitate ezberdineko elikagaiak lortzeko nola lan egiten duten ezagutuko dute protagonistek, horrela, eskolarako egin behar duten elikadurari eta osasunari buruzko lana osatu ahal izateko.

Sentsibilizazioa

Argitalpenaren bidez, haurrak merkatuan dauden Eusko Label produktuetara hurbiltzea nahi da, eta horiek ekoizteko ingurunea eta zenbait berezitasun ezagutzea. Horrez gain, nekazaritzak eta abeltzaintzak lurraldearen kudeaketan eta jasangarritasunean duten rolaz sentsibilizatzea nahi du.

Gizartea eta adin tarte guztiak sentsibilizatzeko etengabeko lan baten beharretik sortzen da. 'Eneko eta Ixabel goi mailako produktuen lurraldean' ekimena haurrei zuzenduta dago berez, baina ez du hor geratu nahi; ekimena gurasoekin ere lotzea espero dute bultzatzaileek.

Oraingoz, 7.000 ale inguru banatuko dituzte paperean (240 astero) Eroskiko hipermerkatuetan asteburuetan egiten diren promozio ekintzetan. Hala ere, ez da baztertzen zabalkunderako bide digitalak erabiltzea publiko zabalago batengana iristeko.

Aurkezpena familia ekitaldi batekin

‘Eneko eta Ixabel goi-mailako produktuen lurraldean’ gaur aurkeztu da 6. Pabiloian (Bilbo). Ekitaldira hurbildu direnek, komikiaren ale bat jasotzeaz gain, aurkezpen antzeztu dinamizatu batez gozatu ahal izan dute, non Euskadiko kalitatezko produktuen jarduera azaldu baita, agerian jarriz kalitateko produktuak kontsumitzeak duen garrantzia, besteak beste, ekonomiari, kulturari edo ingurumenari egiten dieten ekarpen positiboagatik.

Bikainak

Bikainak elkarteak Eusko Label duten elikagaiak ekoizten eta merkaturatzen dituzten Euskadiko 9 elikagai enpresa biltzen ditu: Barrenetxe, Baserria km0, Euskaber, Euskal Sagardoa, Garlan, Giez Berri, Lumagorri, Añanako Gatza eta Udapa. Urte osoan zehar, 9 enpresa horiek hainbat prestakuntza eta sentsibilizazio ekintza garatzen dituzte elkarrekin

Eusko Label eta Euskal Baserri markekin identifikatutako patata kanpainaren balorazioa positiboa izan da

2020ko kanpainan Araban 375 hektarea erabili ziren patata ekoizteko Eusko Label eta Euskal Baserri berme-markekin, eta horietatik 8.773 tona ontziratu dira. Hortaz, pataten % 69 Eusko Label markarekin etiketatu da, eta % 31 Euskal Baserri gisa. Guztira, aurreko kanpainarekin alderatuta, % 23 patata gehiago etiketatu da. Berme-marka duen patataren merkaturatzearen bilakaera historikoa, batez ere Eusko Labela duen patatarena, goranzkoa da. 2012tik 3.411 tona gehiago ontziratu dira, hau da, % 127 gehiago.

Kalitateari dagokionez uztaren hasiera egoera meteorologiko txarrak baldintzatu bazuen ere, azkenean errendimendu ona eta kalitate-parametro onak zituen produktua lortu ahal izan da. Patataren ekoizpena urtarokoa da, eta tuberkulua uzta bildu ondoren kontserbatu egitenda kontsumitzaileei ahalik eta kalitate handienarekin eskaini ahal izateko produktua martxora arte. Baina patata kontserbatzea ez da lan erraza, mikroorganismo patogenoak ernaltzea eta garatzea saihesten duten tratamendu fitosanitarioak saihestu nahi badira.

Kalitatezko produktu bat merkaturatu ahal izateko, Eusko Label patataren ekoizle eta ontziratzaileek mimo berezia jartzen dute produktuaren ekoizpenean, hautaketan eta biltegiratzean. Nekazariek eguneko ordu beroetan tuberkulua biltzea saihesten dute, egunsentian biltzen dute patatak tenperatura jakin bat gaindi ez dezan, bestela ez litzateke Eusko Label patata bezala identifikatu ahal izango.

Patata kontu handiarekin biltegiratu behar da, tenperatura gehiegi murriztu gabe eta azukreen metabolizazioa saihestu gabe, baina hezetasunaren eta tenperaturaren arteko oreka mantenduz, onddo eta bakterioen garapena saihesteko. Ildo horretan, Eusko Labela duten Arabako patata-operadoreak ahalegin handia egiten ari dira patataren kontserbazio-sisteman "zero hondakin" dituen produktu bat izateko, antigerminatzaileak edo bestelako fitosanitarioak aplikatu gabe; sektorea ekoizpen-sistema jasangarrien ikerketan inbertitzen ari da, patatak uzta biltzen duenetik kontserbatu ondoren kontsumitzailearengana iristen den arte. Azkenik, nabarmendu behar da komertzialki Eusko Label patata, Euskadiko eta inguruko saltokietan egoteaz gain, Espainiako estatuan ere ari dela indarra hartzen, bereziki Madrilen.

Eusko Labela duen patataren ezaugarriak

Klimari, lurrari eta tradizioan oinarritutako laboreari esker, gaur egun, Arabako Patata goi mailako kalitatezko elikagaitzat hartzen du kontsumitzaileak. Eusko Labelek, ezarri diren kalitate-azterketak gainditzen dituzten patata motak soilik babesten ditu. Ingurugiroarekiko errespetu osoz erein, hazi eta bildu ondoren, patatarik onenak hautatzen dira kontsumitzaileari elikagai osasungarria, homogeneoa eta kalitatezkoa eskaintzeko.

Nahiz eta Eusko Labela duen Arabako patata zorro mota ezberdinetan aurki daitekeen, badira bi erreferentzia denetan berdinak direnak eta erraz bereizten lagunduko digutenak: zorroaren kanpoaldean ageri den Eusko Label logotipoa eta barruan aurkituko dugun zenbakidun etiketa-ziurtagiria, elikagaiaren benetakotasuna bermatzen duen bakarra. "Arabako Patata" kalitate-zigilua erabiltzeko goi-mailako kalitateari dagozkion baldintzak bete behar dira. Hau da, produktoreek eta teknikariek prestatutako araudian definitutako baldintzak. HAZI arduratzen da baldintza horiek kontrolatzeaz, laborantza, aukeraketa eta ontziratzea gainbegiratuz.

Eusko Label duen Antxoa Euskadiko kalitate ziurtatuko produktuen familian sartu berri da

Gaurtik aurrera, antxoak bat egin du Eusko Label duten produktuen familiarekin, eta, zehazki, arrantza produktuen sortak osatzen du azken urteotan Hegaluzearekin eta Hegalaburrarekin egiten ari den ibilbide ona. Horrenbestez, Eusko Label bereizgarriak emandako Kalitate ziurtagiria Euskadin arrantzatu ohi beste espezie batera hedatzen da, eta araudi tekniko zorrotz batean ezarritakoa bete beharko du.

Eusko Label duen Antxoaren aurkezpena Getarian egin da, eta Eusko Jaurlaritzako Ekonomiaren Garapen, Jasangarritasun eta Ingurumeneko sailburu Arantxa Tapiak nabarmendu duenez, antxoa Eusko Labelen sartuta, Euskadiko arrantza sektoreari tresna berri bat ematen zaio bere produktuak ahalik eta baliorik egokienarekin iritsi daitezen merkatura, eta merkatuan garatzeko aukera gehiagorekin eta tresna berriekin.

Horrekin guztiarekin, Tapia sailburuordeak dei egin dio gizarteari sasoiko arraina kontsumitu dezan, Euskadiko arrandegietan saltzen den Kantauriko antxoa Eusko Labelduna kontsumitu dezan. Tapiaz gain, aurkezpen ekitaldian izan dira Eusko Jaurlaritzako Nekazaritza, Arrantza eta Elikagai Politikako sailburuorde Bittor Oroz, HAZIko zuzendari Peli Manterola eta Euskadiko arrantza sektoreko ordezkariak.

ARGAZKIAK IKUSI

Ezaugarriak

Eusko Label bereizgarriarekin identifikatutako arraina antxoa izango da (antxoa/bokarta), Engraulis encrasicolus espeziekoa. Espezie hori harrapatzeko tartea martxoaren 1etik azaroaren 30era bitartean izango da, eta oso freskotasun onaren sailkapena dutenak baino ez dira onartuko. Baina, gainera, kanpoko itxura, azala edo sendotasuna bezalako gaiak ere kontuan hartuko dira. Lehen fasean, bereizgarriak antxoa fresko dagoela bermatuko du, baina Eusko Label izendapenarekin egindako kontserbak bezalako produktu eraldatuei edo prestatuei ere irekita geratuko da.

HAZIk ezarriko ditu beharrezko jotzen dituen kontrol eta ziurtapen sistemak produktuaren prozesuaren katean, ekoizpenean, kontserbazio eta biltegiratzean, garraioan, ontziraketan, manipulazioan eta merkaturatzean, segurtatzeko Eusko Label bereizgarriaren sinboloekin iristen den produktuak Erregelamenduak eta aplikatu beharreko gainerako araudiek ezarritako baldintzak betetzen dituela.

Datuak

Kostera martxoaren amaieran hasi zen, 26 milioi kilorekin Kantauriko ontzidiarentzat, azaroaren 30era arte. Orain arte, 10,5 milioi kilo harrapatu dira, eta, horren ondorioz, Euskadiko flotak geldialdiak egin ditu arrantzaleentzako espezie garrantzitsuenetako baten kanpaina modu jasangarrian kudeatzeko. Apirilaren erdialdera arte, 3 milioi kilo antxoa inguru deskargatu dira Euskadiko portuetan, 0,87 euroko batez besteko prezioan Horrez gain, 2020an, Euskadiko arrantzaleek 6.500 tona antxoa harrapatu zituzten, hau da, 7,8 milioi euro.

Datu horiek interpretatzeko garaian kontuan hartu behar da iazko kostera oso konplexua izan zela, kanpainako egun askotan gure flota geldirik egon zelako, Covid-19aren pandemiak eragindako konfinamenduaren ondorioz. Kiloko batez besteko prezioa 1,25 eurokoa izan zen.

Zabalik dago kontsumitzaileek On Egin bonuak lortzeko epea

HAZIren eta Eusko Jaurlaritzako Ekonomiaren Garapen, Jasangarritasun eta Ingurumen Sailaren bidez garatutako ON EGIN BONOA ekimenaren helburua da Euskadiko kalitate bereiziko produktuen kontsumoa sustatzea. Kalitate ziurtatuko produktuetan 100 euro erosteagatik, kontsumitzaileek 50 euroko deskontu bonua jasoko dute Euskadiko turismo ostatuetan.

Hauek dira kanpainari lotutako produktuak: Arabako, Bizkaiko eta Getariako Txakolina, Arabako Errioxako Ardoa, Arabako Errioxako Cava, Idiazabal Gazta, Euskal Sagardoa, Basque Beer, Euskadiko Ekoizpen Ekologikoa eta Eusko Label.

Covid-19ak ondorio negatiboak eragin ditu Euskadiko elikadura katearen azpisektore askotan, eta, ekimenaren bidez, kalitatezko elikagaiak eta edariak ekoizten dituzten lehen sektoreko eragileei lagundu nahi zaie. Zehazki, hauek dira On Egin Bonoak kanpainan parte hartuko duten produktuak: Arabako, Bizkaiko eta Getariako Txakolina, Arabako Errioxako Ardoa, Arabako Errioxako Cava, Idiazabal Gazta, Euskal Sagardoa, Basque Beer, Euskadiko Ekoizpen Ekologikoa eta Eusko Label.

Aipatutako produktuen kontsumoa sustatzeaz gain, egitasmoaren nahia da pandemiak gehien kolpatu dituen sektoreetako beste bat bultzatzea, Euskadiko turismo ostatuak ere babestuz, izan ere, sustapen eta bultzada programa, zehazki euskal biztanleei zuzenduta dagoen arren, Euskaditik kanpoko lagunak ere baliatu ahal izango dira, identifikatutako produktuak kontsumitzen badituzte. Deskontuen bitartez antolatuko da ekimena, proiektuari atxikitako turismo ostatuetan erabiltzeko.

Bonuak lortzeko, kontsumitzaileek Euskadin ziurtatutako kalitate bereiziko produktuak erosi beharko dituzte, gutxienez 100 euroren truke, faktura bakarrean, txikizkako dendetan, merkataritza elektronikoko atarietan eta Euskadiko lehen sektore eta elikagaien sektoreko ekoizleen zuzeneko salmenta puntuetan.

Erosketa egin ondoren, erosketaren fakturari argazkia atera, webgunera igo eta 50 euroko bonuaren eskaria bete behar dute. Webgunean bertan kontsultatu ahal izango da zeintzuk diren erosketa egiteko eta deskontu bonoaz gozatzeko aukeratu daitezkeen dendak eta ostatuak. Pertsona bakoitzak bere NANaren zenbakiari lotutako bi bonu lortu ahal izango ditu gehienez, eta ezingo dira metatu (bonu bat ostatuko gau bakoitzeko). Oraindik ekimenarekin bat egin ez duten denda edo establezimenduak garaiz daude, maiatzaren 22ra arte eman baitezakete izena oneginbonoa.eus webgunean.

Horiek guztiak kanpainaren irudiarekin identifikatuko dira (On egin bonoa), errazago aurkitzeko. Guztira 30.000 bonu eskainiko dira, eta horiek emateko baldintza programarako erabilgarri dagoen aurrekontua izango da, hau da, funts horiek agortzen direnean programa amaitu egingo da, eta ezingo da bonurik lortu.

Epeak

Maiatzaren 22ra arte: dendak eta hotelak programara gehitu daitezke.

Apirilaren 19a: egun horretatik aurrera egiten diren erosketak promozioan sartuko dira.

Ekainaren 1a: bonuez baliatzeko epea hasiko da.

2021eko abenduaren 31: bonuak lortzeko epea amaituko da.

2022ko abenduaren 31: bonuez baliatzeko epea amaituko da.

ON EGIN WEB ORRIA

 

Enpresaren finantzen kudeaketa hobetzeko prestakuntza-ibilibidea

COVID osasun-krisiaren ondoriozko merkataritza-zailtasunen ondorio gisa, upeltegiak eta nekazaritzako elikagaien beste enpresa asko diruzaintzako tentsio handiak izaten ari dira, eta kasu askotan finantza-erakundeei baliabideak eskatzera behartuta daude.

HAZIK, Elkargiren eskutik prestakuntza-ibilbide bat diseinatu du enpresaren finantzen kudeaketa hobetzeko eta, ondorioz, kanpoko finantzaketaren bilaketa horretara hobeto prestatuta joateko. Ibilbide hau Ardoa Basque Wine Office bulegoaren babespean dauden enpresa guztiei zuzenduta dago, baina guztiz baliagarria da nekazaritzako elikagaien gainerako enpresentzat.

Ikastaroa 8 ordukoa izango da, eta apirilaren 20an, 22an, 29an eta maiatzaren 6an emango da, 09: 00etatik 11: 00etara. On line izango da Zoom aplikazioa bidez.

IBILBIDEA

Informazio gehiago eta izen-emateak

Ardoa – Basque Wine Officek neurri sorta zabala aurkeztu du, 2021ean edarien sektoreari salmentan laguntzeko

HAZIk  aurkeztu du, enpresa eta erakunde sektorialekin lankidetzan, diseinatu duen bide orria, Covid 19aren pandemiak Euskadiko edarien sektorean (ardoa, txakolina, sagardoa, garagardoa, etab.) eragiten ari den egoera zailari aurre egiteko. Finantza laguntzako hainbat neurriz gain, Ardoa-Basque Wine Officek koordinatutako ekintza nagusiak produktua tokiko eta nazioarteko merkatuetan sustatzera eta posizionatzera bideratzen dira nagusiki.

2020 ko ardoen esportazio datuak

Aduanek erregistratutakoaren arabera, Euskadik %2 handitu zuen ardo esportazioagatiko fakturazioa 2020an, 205 milioi eurotik gora, 2016ko eta 2017ko fakturazioaren ondoren orain arte izan den hirugarren fakturaziorik handiena, nahiz eta orduan batez besteko salmenta prezioa egungoa baino askoz txikiagoa izan. Hala, EAEko ardo esportazioek 2020ko krisia gainditu dute, batez besteko prezioaren igoerari esker.

Izan ere, Euskadik inoizko preziorik handienean esportatu zuen ardoa iaz, litroko 4,28 euroraino %4,8 igo baitzen, balio erantsi handiena duten ardoen (JDB) bilakaera hobeagatik. Esportatutako bolumena apur bat jaitsi zen, 48 milioi litroraino (-% 2,7). Hitz batean, Euskadik 4 milioi euro gehiago fakturatu zituen, 2019ko datuekin alderatuta 1,3 milioi litro gutxiago esportatu arren.

Hala ere, hori ez da nahikoa izan barne merkatuko salmenten beherakada arintzeko; izan ere, %42ko kotara iritsi zen, batez ere HORECA kanalean; izan ere, kanpoko salmentak sektoreko fakturazio osoaren %35 baino ez dira.

Posizionamendua eta merkaturatzea indartzea

Finantza tresna guztiak ez ezik (OCM-Ardo sustapena, Lehiatu Ardoa, Nekafin, Mugagabe Ardoa, etab.), Eusko Jaurlaritzak sektoreari laguntzeko ekimen multzo bat diseinatu du, sektorearen lehiakortasuna hobetzea lortzeko, esaterako, posizionatzeko eta merkaturatzeko ekintzak indartzea, eta Euskadiko upategiak eta ardoak sustatzeko ekimen berriak abiaraztea.

Euskadiko edarien industria sarea osatzen duten markak bultzatzea eta sustatzea helburu duen Ardoa Basque Wine Office bulegoak koordinatuta eta finantzatuta, hainbat ekimen garatzen ari dira, hala nola hauek:

  • www.basquewine.eus webgunearen garapena, Ardoa Lurraldearen Ataria. Atari bakarra lantzea, Euskadiko upategi guztientzat.
  • Basque Wine lizentzia emateko programa. Euskadiko upategietarako "Basque Wine" bereizgarria duen sustapen marka erregistratu da, eta orain arte 60 erabilera eskaera baino gehiago erregistratu dira.
  • "Gure Ostalaritzan, Basque Wine" atxikipen programa. Lankidetza hitzarmena Gipuzkoako Ostalaritza Elkartearekin, Bizkaiko Ostalaritza Elkartearekin, GasteizOn elkartearekin eta SEA-Ostalaritzarekin, ostalaritza establezimenduak Basque Wine kontzeptuari atxikitzeko programa bat garatzeko.
  • Kalitateko produktuak eta markak sustatzeko "On Egin Bonoa" kanpaina, turismo establezimenduetan gauak igarotzeko bonuak antolatuz.
  • Basque Wine sektore laguntzako programa berriak definitzea eta ezartzea. Sektoreari laguntzeko Haziren programak batzen ari dira, berrikuntzarako eta nazioartekotzerako Onekin ekintzailetza ekimenaren esparruan.
  • Prestakuntza ikastaroak. Ardoa Basque Wine Officek hainbat prestakuntza ikastaro eskaintzen dizkio sektoreari 2021eko lehen seihilekorako, hala nola nekazaritzako produktuak esportatzeko ikastaroak, artisau garagardoa egonkortzeko teknikak, upategia eta biltegia kudeatzea, enoturistaren esperientzia hobetzea, etab. Era berean, "Basque Wine aditua" tituluaren/zigiluaren sorrera garatuko da, gastronomiaren arloan garrantzitsuak diren eragileekin lankidetzan.

Era berean, joan-etorriak egitea ezinezkoa denez, sustapena digitalizatzeko lanean ari gara, produktuaren aurkezpenak edota dastaketak on-line garatuz, webinar formatuan.

Ardoa Basque Wine Officeri buruz

Ardoa-Basque Wine Office bulegoak laguntza osoa eskaintzen dio Euskadiko edarien sektoreari, Arabako Errioxako upategiak, hiru Txakolin Izendapenak, Sagardoa eta Garagardoa tokiko merkatuan eta merkatu estatalean zein nazioartekoan aurrera eramaten ari diren estrategia indartzeko.

Eusko Labelek Euskal Herriko txirrindularitza itzulia babestuko du

Orain arte, Eusko Labelek Euskadin errotuta dauden hainbat kirol babestu ditu, esaterako, pelota, arrauna eta aizkora, eta gaurtik aurrera Itzulia Basque Countryko laguntzailea izango da.

Eusko Label markaren nabarmentasuna handitu edo mantentzeko helburuarekin mendiko maillotak marka horren logoa emango du eta hainbat puntu estrategikotan ere Eusko Label presente egongo da.

Itzulia apirilaren 5etik 10era ospatuko da, eta atzo izan zen aurkezpenean Mikel Arrillaga izan zen, HAZIko Marka eta Merkatuen Arduraduna.

Itzuliaren babesletzaz gain, Eusko Labelek udaran ospatuko den Gizonezkoen eta Emakumezkoen San Sebastián DonostiaKlasikoan ere hartuko du parte.

scribdicon

HAZI. Egoitza Nagusia. Granja modeloa z/g 01192 Arkauti, Araba. IFK. G48986137  l T 945 00 32 40 | hazi@hazi.eus | Pribatutasun Politika | Ohar Legala | Urrutiko Kontrola