banner7.jpg

Berriak

Mundu hobea lantzeko kanpaina

Eusko Jaurlaritzak, HAZIren bitartez eta Familia Nekazaritzako Batzordearekin lankidetzan, kanpaina bat jarri du abian Euskadin familia-nekazaritzak duen garrantzia nabarmentzeko. Gure nekazaritza eta abeltzaintzako profesionalen lana balioesten du, egiten duten lanaz harro dagoen sektore baten irudia transmitituz, gure ingurunea kontserbatzeko ezinbestekoa dena.

Haren balio estrategikoa nabarmentzen da, funtsezkoa baita gure gizartearen erronka handiei erantzuteko: elikadura osasungarria, krisi klimatikoa, lurraldearen egituraketa, iraunkortasun ekonomikoa eta biztanleriaren ongizatea.

Benetako profesionalak dituen kanpaina abendutik aurrera ikusi ahal izango da, eta honako pieza hauek ditu:

2022rako Prestakuntza-beharrak helarazteko epea zabalik da

HAZIk hurrengo seihilabeteko (2022ko urtarrila-ekaina) formakuntza-eskaintza lantzen hasi da. Diseinu fase honetan ezinbestekoa da ikastaroetan parte hartu nahi duten pertsonen formakuntza-beharrak ezagutzea, lehen sektorearentzat eta kate osoarentzat baliagarri izan daitezkeen edukiak eskaini ahal izateko.

Horretarako, formulario bat jarri dugu beharren bat bidali nahi duen ororen eskura. Proposamenak jasotzeko epea abenduaren 3 arte egongo da zabalik.

  • ZER: Lehen sektore eta kate osoko formakuntza-beharrak
  • ZERTARAKO: 2022.ko lehen seihilabeteko formakuntza-eskaintza lantzeko
  • EPEA: Abenduak 3
  • NOLA: Inprimaki honen bidez.

Zaporeak eta kalitateak badute saria

Kontsumitu Eusko Labela duten produktuak eta irabazi Gabonetako saski bat. Baimendutako harategietan bakarrik.

Aurten, ohikoa den moduan, Euskadiko kalitate-bereizgarria duten elikagaiz eta edariz betetako saski bat lortu ahal izango duzu, baimendutako harategietan Eusko Label produktuak eta produktu horiekin prestatutakoak erosita.

Parte hartzeko, 10 euroko edo hortik gorako erosketa bat egin eta harakinak emango dizun txartela bete beharko duzu; gero, txartela postontzian sartu beharko duzu, besterik gabe.

Informa zaitez zure harategi baimenduan!

Abeltzain Eskola: esnetarako behien ikastaro trinkoa

HAZIk eta Artzain Eskolak Abeltzain Eskola jarri dute martxan: esnetarako behi-aziendaren ikastaroa, teoria eta praktika uztartzen dituen Artzain Eskolaren eredu arrakastatsuari jarraituz, esnetarako behi-denda handietan praktikak egiteaz gain.

Ikastaroa gaur egungo abeltzainen seme-alabei zuzenduta dago bereziki, baita esnetarako behiekin baserrietan lan egin nahi duten gazteei ere. Eskolak Aretxabaletako Areantza Etxebarri baserrian emango dira, azaroaren amaieratik martxora arte (4 hilabeteko iraupena)

LIBURUXKA IKUSI

Interesdunek izena eman dezakete 943.251008 telefonora deituz edo E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbide elektronikora idatziz.

GESVAC 4.0 proiektua onartu da eta HAZI da bazkideetako bat

GESVAC 4.0: “Eraldaketa digitalaren bidez abeltzaintzako ustiategien errentagarritasuna hobetzeko kudeaketa aurreratuko lankidetza-plataforma” onartu du Nekazaritza, Arrantza eta Elikadura Ministerioak lankidetzarako 16. neurriaren europar dirulaguntzen esparruan. HAZI bazkide onuraduna den proiektu honen xedea da haragitarako behien kudeaketa-sistema bat garatzea teknologia digitalean oinarrituta, sektoreko estrategiak definitzeko.

Proiektua amaitutakoan abeltzainak bere ganaduaren informazio osoa izatea espero da eta garatutako sistemaren bidez erabilera, genetika, nutrizio edo osasun arloko erabakiak hartu ahal izatea, adierazle horietako bakoitza hobetu ahal izateko.

Laguntza hauek 430.411,68 eurokoak izango dira eta finantzazioari dagokionez, ehuneko 80 Landa Garapenerako Europako Nekazaritza Funtsaren (LGENF) gain izango da eta beste ehuneko 20 Nekazaritza, Arrantza eta Elikadura Ministerioaren gain, Landa Garapenerako Programa Nazionala 2014-2020aren baitan. Erakunde onuradunak GESVAC 4.0 talde operatiboko kideak dira eta talde horretan HAZI egoteaz gain, beste honako hauek ere badaude: Espainiako Xaroles Arrazako Azienda Bikainaren Hazleen Elkartea (UCHAE), ABELUR, Bajo Duero sozietate kooperatibo mugatua (COBADU), Gaztela eta Leongo Nekazaritzako Institutu Teknologikoa (ITACyL) eta Imasde Agroalimentaria SL ikerketa-zentro pribatua.

HAZIk abian jarri ditu ONekin! berrikuntzarako eta digitalizaziorako programak

ONekin! Berrikuntza eta ONekin! Digitala izenarekin HAZIk bultzatutako bi programen oinarriak argitaratu dira Ekonomiaren Garapen, Jasangarritasun eta Ingurumen Sailaren Euskadiko elikaduraren eta zuraren balio-kateko digitalizazio adimentsua garatzeko esparru estrategikoan. Programa horiek kate hori osatzen duten pertsona eta enpresa guztien lehiakortasuna eta produktibitatea hobetzeko tresna gisa balioko dute, eta sektore premia berriak aseko dituzten produktu berriak garatzeko aukera emango dute. Ekimen horren bidez, diruz lagunduko dira ETE-ek eta mikroETE ek beren produktuak, zerbitzuak eta negozio-prozesuak hobetzeko jarduerak.

Bi programetan izena emateko epea aurtengo azaroaren 18tik abenduaren 2ra bitartekoa da, eta horien onuradun izan daitezke Euskadiko nekazaritzako elikagaien, basogintzaren, gastronomiaren eta arrantzaren sektoreko pertsona fisiko edo juridiko pribatuak edo horien elkarteak, betiere zergak Euskal Autonomia Erkidegoan ordaintzen badituzte. Euskadiko Kooperatiben Federazioan izena emanda duten sozietate kooperatiboek ere egin ahal izango dute.

Dirulaguntzaren ehuneko eta gehieneko zenbatekoa erakunde onuradunen motaren araberakoak izango dira: diruz laguntzeko moduko kostuen % 69 eta % 70 artekoa, eta gehieneko zenbatekoa 5.000 eurotik 24.000 eurora bitartekoa.

Proiektuak diseinatzeko, gidatzeko eta garatzeko beharrezkoak diren gastu guztiak aukeratu ahal izango dira. Programa horietara sartu ahal izateko, enpresek onekin.eus webgunean argitaratuta dauden oinarrietan jasotako zenbait baldintza bete beharko dituzte.

ONekin! Berrikuntza

Berrikuntzaren bidez jardueraren eta negozioaren erritmoa berreskuratzea bultzatzeko programa; eta berrikuntza hori teknologikoa izan daiteke edo ez. ONekin! Berrikuntza programarekin produktuak (ondasunak edo zerbitzuak) hobetzen edo jarduera dibertsifikatzen lagunduko duten proiektuen garapenari aholkularitza eta laguntza eman nahi zaio, bai eta ekoizpen-prozesuak garatzera bideratutakoei ere, horien efizientzia eta eraginkortasun handiagoa lortze aldera.

Informazio gehiago

ONekin! Digitala

Programa horren bidez, ekoizpen-kate osoan teknologia digitalak atxikitzea erraztu nahi da, enpresen lehiakortasuna hobetzeko eta euskal ekosistemako erakundeen arteko lankidetza sustatzeko, irtenbide teknologiko komunak sartzeko. Irtenbide horiek ezartzeko dirulaguntzaz gain, digitalizazioaren esparruan jasotako aholkularitza-zerbitzuak ere diruz lagunduko diren gastutzat jotzen ditu programa horrek. Banakako enpresei/profesionalei, kolektiboei, kooperatibei eta nekazaritza egiturei zuzenduta dago.

Informazio gehiago

Orain abian jarriko diren bi finantzaketa-ildo horiez gain, aurreikusten da ONekin! Saiatu programaren eskabideak aurkezteko epea datorren urtarrilean zabalduko dela. Programa hori ekintzailetzara bideratuko da.

Informazio gehiago

Eusko Labela duen Euskal olioaren ezaugarriak hedatzeko jardunaldia

Gaur goizean, Hernaniko Chillida Leku Museoan, gastronomia munduko profesional eta preskriptoreei zuzendutako aurkezpen-jardunaldia egin da, Eusko Labela duen Oliba Olio Birjina Estraren erabileraren eta kontsumoaren abantailak ezagutarazteko. Bere ezaugarri eta dohainen berri emateaz gain, Euskadiko olioaren ekoizpen-sektoreari buruzko datuak eta jarduera horrek bizi duen egoerari buruzkoak eman dira ezagutzera aurkezpenean, gaur egun 57 profesional baitaude bertan erregistratuta.

 

Eusko Labela duen Oliba Olio Birjina Estra ekoizpen mugatuko elikagaia da, Arroniz barietatearekin egina, eta kalitate-ezaugarri batzuk ditu, olio berezi bihurtzen dutenak, baina oraindik ere ezezaguna da euskal kontsumitzaileentzat. Hori dela eta, HAZIk eta Arabako Errioxako Olibondoa eta Olioa Sustatzeko Elkarteak (APRORA) antolatutako jardunaldi honen helburua euskal gastronomiarekin lotutako adituek produktu horiek sustatzea da, eta olio-dastaketa egitea eskaini zaie, Euskal Ogia eta Euskal Gatzarekin.

Euskadin 160 hektarea baino gehiago daude erregistratuta gaur egun olibondoaren laborantzarako, 75 hektareako olio-azalerarekin, eta horietatik 20.000 litro olio ekoizten dituzten ia 100.000 kilo oliba ateratzen dira kanpainan zehar.

ARGAZKI BILDUMA

HAZIk, Basque Culinary Centerrek eta euskal gastronomiaren agente nagusiek “Mantala Basque Gastronomy” aurkeztu dute

Mantala Basque Gastronomy ekimenaren xedea da euskal gastronomia sustatu eta garatzea, ezagutzaren trukea eta elkarrekiko sormena sustatuz. Basque Culinary Centerrek eta Hazi Fundazioak bultzatuta, Eusko Jaurlaritzako Ekonomiaren Garapen, Jasangarritasun eta Ingurumen Sailak sustatutako Euskadiko Gastronomia eta Elikaduraren Plan Estrategikoaren (PEGA) esparruan, Mantala edukien plataformak eragile publiko eta pribatuen sare batekin lankidetzan eraiki da: Gastronomiaren Euskal Akademia, Fecoga, eta Jakitea, besteak beste. Gaur inoiz baino gehiago funtsezkoa da euskal gastronomiaren kokapena indartzen jarraitzea mundu-mailan.

Mantala espazio gisa planteatzen da, non ezagutza, ikerketa eta lankidetza gastronomikoan oinarritutako hainbat edukik eta proiektuk bat egiten duten. Ekimenak euskal gastronomiaren identitatearen balio nagusien garapena eta entzutea sustatzen du, modu dinamikoan eta etorkizunerako ikuspegiarekin, kalitatezko eduki digitalak hedatu eta agerian jarriz webgune batean (www.mantala.eus - profil sozialekin lotuta), baita hainbat ekitaldirekin ere. Gainera, Mantala hainbat proiektu zentraletan oinarrituko da, komunikazio-ardatz nagusia indartuko dutenak.

Pertsonak, egiten jakiteari, ezagutzari eta euskal gastronomiarekin lotutako bizipen pertsonalei dedikatutako espazioa, figura eta istorio inspiratzaile eta funtsezkoen bidez; Mapa gastronomikoa, Euskadi osoko tokiko prestaketa eta produktuen erregistro eta katalogaziora bideratutako proiektua, zeinaren helburua den eduki berriak sortzea eta ezagutzaren transmisioa bermatzea; Euskal Gastronomiaren topaketa, sektorearen indartzea izango du xede nagusi hausnarketaren eta etorkizuneko gakoak hautematearen bidez, eta, horretarako, euskal sektore gastronomikoa osatzen duten profesionalen arteko elkarrizketa sustatuko du; eta Gastro Gaztea, euskal gastronomiako talentu handiko gazteak bilduko dituzten afariak izango dira.

Mantalako aktore arduradunek Gastro Gaztearen lehen afaria aprobetxatu dute proiektua elkarrekin aurkezteko. Aurkezpenean izan dira Bittor Oroz, Nekazaritza, Arrantza eta Elikadura Politikako sailburuordea, Peli Manterola, HAZIko zuzendari nagusia eta Joxe Mari Aizega, Basque Culinary Centerreko zuzendaria. Gainera, ekimenean parte hartu duten gainerako eragileen ordezkariak ere izan dira: Rafa Gorrotxategi, Jakitea-ko lehendakariordea, M. Mar Churruca, Euskal Gastronomia Akademiako presidentea, eta Juan Manuel Garmendia, FECOGAko presidentea. Tabakalerako LABe Restaurant-en eskaini den Gastro Gaztea-afariak, esparru ezin hobea ekarri du Mantala aurkezteko.

Ekintza gastronomiko ezberdinak

 

Euskal gastronomiaren barruan mugimendu gazte eta dinamiko bat dago, ekintzailetzan, laguntasunean, jasangarritasunean eta tokiko produktuaren balioan oinarritzen dena. Testuinguru horretan, hainbat ekintza gastronomiko jarri dira abian, funtsezko zutabe horiei balioa emateko, eta plater ezberdinen bidez, sasoiko produktua eta sukaldaritzako teknika tradizionalen garrantzia lantzeko. 6 eskutara burutu den lehen afarian, eskualde bakoitzeko jatetxe banako sukaldariek hartu dute parte: Garena Jatetxea (Bizkaia), Kromatikoa Jatetxea (Araba) eta Ama Taberna (Gipuzkoa).

Afarian erabilitako edariak, txakolina, sagardoa eta ardoa, Basque Wine-ek eskaini ditu - promozio marka horrek kalitatezko kalitatezko marka eta jatorri ezaguna duten Euskadiko edariak onartzen ditu.

Informazio gehiagorako: www.mantala.eus

HAZIren laguntzarekin 23 euskal enpresak parte hartuko dute Gourmets Azokan

Eusko Jaurlaritzako Ekonomiaren Garapen, Jasangarritasun eta Ingurumen Sailak, HAZIrekin lankidetzan, 23 euskal enpresa ekoizlek taldean Gourmets azokako 34. edizioan parte hartzea sustatu du. Ekitaldi hori kalitatezko elikagaien eta edarien Europako nazioarteko azoka handiena da, eta Madrilen egiten ari dira bihar arte. Gourmets azoka lehenengoz egin da, iazkoa bertan behera geratu odnoren, pandemia tarteko. Hori dela eta, positiboki baloratu da edizio honetan Euskadi Basque Country markaren babesean parte hartu nahi izan duten euskal enpresen kopurua. Eusko Jaurlaritzaren xedea da Euskadiko elikagaien eta edarien industria nazioartekotzea, joeren erakusleihoak baliatuta, hala nola Gourmets azoka.

Erakundeek sektorea babestearen erakusgarri, gaur goizean, Eusko Jaurlaritzako Nekazaritza, Arrantza eta Elikagaien Politikako sailburuorde Bittor Oroz eta HAZIko zuzendari Peli Manterola Madrilen izan dira, azokan parte hartzen ari diren enpresak bisitatzeko.

Edizio honetan, enpresa hauek ari dira parte hartzen Euskadi Basque Country markaren standean:

  • Sal de Añana
  • Ameztoi
  • Bacalaos Alkorta
  • Casa Eceiza
  • Agour Berri
  • Txakoli Agerre
  • Conservas Serrats
  • Hamburguesas Eizaguirre
  • Gelati !! Gelati !!
  • Casa Brigitte SL
  • Bacalaos Ederpesca
  • Conservas Olasagasti
  • Luis Thate
  • Patatas Sarriegui
  • Conservas Campos
  • Rafa Gorrotxategi 1680 SL
  • Zubia
  • Artomaña
  • Bello Berganzo
  • Bodega Berroja
  • Blai & Blai
  • Gil Berzal
  • Hermanos Frías Del Val

Gourmets azokari buruz

Gourmets azoka munduko erreferente ospetsuenetako bat da elikagaien eta edarien industriarako. Nazioarteko profesionalen topagune nagusia da. Bertan, produktu tradizional bikainak zein joera berriak aurki daitezke, eta gastronomiako profesionalentzat da soilik: jatetxeak, ostalaritza, banaketa, cateringa eta saltoki espezializatuak. 2021eko azokan, 70.000 bisitari profesional izatea espero da, baita 1.500 enpresa gastronomiko ere, 37.000 produktu eta 1.300 berritasunekin.

Euskadiko elikagaiak eta edariak sustatzen diardugu

Gourmets azoka izan da Eusko Jaurlaritzako Ekonomiaren Garapen, Jasangarritasun eta Ingurumen Sailaren eskutik euskal elikadura-enpresek udazken honetan parte hartu duten azken azoka.

Guztira, 44 euskal enpresak parte hartu dute Euskadi Basque Country markapean azoka horietakoren batean. Dagoeneko baieztatu da euskal elikadura-industria sektorerako hainbat hitzordu komertzial garrantzitsutan izango dela 2022an: Wine París & Vinexpo, Fenavin, ProWine Asia Singapur, ProWein eta Alimentaria. Gainera, Euskadiko Elikagaien Industriaren 2022ko Sustapen Planak programatutako ekintza guztiak jasotzen ditu, euskal enpresei nazioartekotzen laguntzeko, haien produktuak sustatzeko eta merkatu berrietan duten presentzia areagotzeko.

Estamentu publikoetan emakumeen parte-hartzea areagotzeari buruzko aldarrikapena izan da Landa Eremuko Emakumeen Nazioarteko Egunaren ardatza

Eusko Jaurlaritzak aurten ere ospatu du Landa Eremuko Emakumeen Nazioarteko Eguna. Horren harira, jardunaldi bat antolatu du goizerako, “Landa-eremuko emakumeen parte-hartze publikoa” lelopean. Horren baitan emakumeek bizitza publikoa eta soziala osatzen dituzten estamentu eta erabaki-organoetan jokatzen duten rola aztertu eta aldarrikatu nahi izan da. Landaren eta Itsasertzaren Garapeneko eta Europar Politiketako zuzendari Jone Fernándezek aurkeztu du topaketa, eta amaierako mahai-inguruan bitartekari-lanak ere egin ditu.

Bere hitzetan, hauxe da egunaren helburua: “Landa-eremuko garapen sozioekonomikoan, elikagaien segurtasunean eta pobrezia errotik ezabatzeko zereginean emakumeek duten funtsezko rola aitortzeko lanetan aurrera egitea. Ekonomiaren Garapen, Jasangarritasun eta Ingurumen Sailak, HAZIrekin batera, ia hogei urte daramatza ekitaldi hori antolatzen, landa-eremuko emakumeek egiten duten lanaren balioa azpimarratzeko xedez, eta landa-inguruneko emakumeen eta gizonen arteko berdintasunaren sustapenean aurrera eginez”.

Hitzaldiak

Jardunaldian, izen handiko hiru emakume adituren hitzaldiak izan ditugu. Lehendabizi, Errotik Kooperatiba Feministako kide Esther Escuderok parte hartu du, eta “Emakumeen parte-hartzea esfera publikoan” gaia landu du. Hitzaldiaren bidez, esfera publikoen egungo egoeraren irudi orokor bat osatu du, datu estatistiko eta txosten garrantzitsuenen analisiaren bidez, eta bereziki azpimarratu ditu parte-hartze orekatua, egiazkoa eta eraginkorra izateko dauden zailtasun nagusiak. Ondoren, Leire Milikuak hartu du hitza, eta “Landa-eremuko emakumeak, emakume nekazariak: garrantzia eta parte-hartzea” gaia jarri du mahaiaren gainean. Haren hitzaldian, landa-ingurunearen eta eremu geografiko bakoitzaren testuinguru soziokulturalaren berezitasunak aztertu ditu, eta Euskadiko landa-ingurunearen egungo egoerari buruzko azalpenak ere partekatu ditu. Leire Milikua Emakume Nekazarien Estatutuaren idazkari teknikoarekin lankidetzan aritu da, eta, gaur egun, Emakunderen beka baten bidez ari da Euskadin emakumeek nekazaritzaren sektorean duten parte-hartzeari buruzko azterlan bat egiten. Azken hitzaldia Pilar Legarrak egin du, eta “Emakumeak toki-erakundeetan” gaia izan du ardatz. Pilarrek nabarmendu du Euskadiko alkateen herena baino gutxiago besterik ez direla emakumeak, eta soilik hamar udalerri handienetako lautan jarduten dutela.

 

Halaber, adierazi du ez dagoela zinegotzigoei buruzko daturik. Bere ustez, denboraren antolaketa landu behar da, horrek politikan inplikatzen diren pertsona guztiei —gizonak eta emakumeak— ekarriko baitie onura; hala ere, emakumeek nagusiki desabantaila dutela ikusita, emakume politikariei onura handiagoa ekarriko die, eta, horrela, eragin-eremua parekatuko da. Jardunaldiari amaiera emateko, mahai-inguru bat antolatu da. Bertan, hiru hizlariek beren testigantzak eta esperientziak partekatu dituzte landa-eremutik alor publikoan parte hartzeko arazoak zuzenean ezagutzen dituzten bi emakumerekin: Nieves Quintana (ACOVI Gasteizko Kontzeju Elkarteko presidentea) eta Itsaso Agirre (ELE - Gipuzkoako Latxadunen Elkarteko eta GILE - Gipuzkoako Limousin Arrazako Ganadu Hazleen Elkarteko kidea).

Emakume Nekazarien Estatutua

Gaur, 2021eko urriaren 15ean, 6 urte bete dira Eusko Legebiltzarrean Emakume Nekazarien Estatutua aho batez onetsi zenetik. Estatutu horrek emakume nekazarien eskubideak hartzen ditu abiapuntu, eta administrazio publikoen betebeharrak zehazten ditu, eskubide horien erabilera eraginkorra bermatzeari begira. Hortaz, nekazaritzaren sektorean emakumeen eta gizonen arteko tratu- eta aukera-berdintasuna erdiesteko eta sektorearen alor guztietan genero-ikuspegia txertatzeko beharrezko neurriak jasotzen dituen legea da. Ezinbestekoa da emakumeek alor publikoan parte hartzeko pairatzen dituzten desberdinkeriak gainditzea nekazaritzaren sektorean emakumeen eta gizonen arteko benetako berdintasun eraginkorra lortu nahi bada; eta, horretarako, gako-gaietako bat dira ustiategietako baterako titulartasunak, horrek dakartzan eskubideekin, emakumeek ustiategietan egiten duten lana ikusarazteko.

Nekazaritzako, Arrantzako eta Elikagai Politikako Sailburuordetzak,HAZIren lankidetzarekin, titulartasun partekatuari buruzko ikerketa bat bultzatu du. Ikerketa hori Nekazaritzako, Arrantzako eta Elikagai Politikako Sailburuordetzak 2021eko martxoaren 30ean Emakume Nekazarien Estatutuaren Jarraipen Batzordeko Osoko Bilkurari iragarritako jarduketa-planaren parte da.

Somerset-eko (Erresuma Batua) Hauser & Wirth arte-zentroak Euskadiko eskaintza gastronomiko eta enologiko zabala eskaintzen die bisitariei

 

“Hauser & Wirth Somerset” galeriak Eduardo Chillida euskal artistaren hainbat lan jasoko ditu 2022ko urtarrila bitartean, Somerseteko (Erresuma Batua) Durslade Farm-eko instalazioetan. Erakusketak topaketa berriak proposatuko ditu Chillidaren obraren eta Hauser & Wirth Somerset-en ingurune paregabearen artean, eta  paralelismo bat ezarriko du artistaren ikuspegiarekin Chillida Lekurentzat

Ekimen honen esparruan, Basque Wine Euskadiko edarien sustapen-marka ekitaldiaren babesle gastronomikoa da, eta euskal eskaintza gastronomiko eta enologikoa jartzen du haren eskura, Eduardo Chillida artista unibertsala sortu zen euskal kultura ulertzen laguntzeko.

Eusko Jaurlaritza eta HAZIren eta Chillida Lekuren arteko lankidetza hitzarmen helburu nagusia Basque Wine promozio markapean babestutako edariak ezagutzera eramatea da. oposamena "Basque Fest" baten bidez gauzatzen ari da, eta, horretarako, Durslade Farm enpresaren instalazioetan urriaren 8tik 11ra eta 22tik 23ra bitartean egingo diren ekitaldiak baliatu dira. Urriaren 22-23ko asteburuan, euskal kultura-ekitaldien programa bat egingo dute Eusko Jaurlaritzako Kultura Sailaren eskutik, Kukai eta Oreka TX taldeekin, eta horri esker, bisitariak Euskadiko kultura gastronomikoan murgilduko dira. Lan-proposamenari esker, Basque Fest-ek irauten duen sei egunetan bisitariek euskal gastronomian oinarritutako menua izango dute. Menu horri euskal gastronomiak eskaintzen dituen aukeren adierazgarri izango da, eta Euskadin ekoizten diren eta Basque Wine markak babesten dituen edarien eskaintza osoa izango du. Zehazki, honako edari hauek izango dira: Arabako, Bizkaiko eta Getariako Txakolina, Euskal Sagardo Naturala eta Arabako Errioxako ardoa.

Urriaren 8an, 50 mahaikiderentzako gala-afaria eskaini zen eta menua euskal jakin tradizionalek osatu zuten. Gainera, plater bakoitza Basque Wine edari batekin uztartu zen.Urriaren 9an, berriz, festa bat antolatu zuten aire zabalean. 300 lagun bildu ziren eta euskal jaki tradizionalen "zutik jateko" menua izan zuten. Menua bisitarien eskura zeuden "pintxoz" beteriko erakustokietan aurkeztu zen, bisitari bakoitzak gutxienez horietako batzuk dastatzeko aukera izan zezan. Menuaren zati bat jendearen aurrean prestatu zen, parriletan, Euskadiko teknika tradizionalen bidez; horrez gain, bananduta zeuden erakustokietan, edarien eskaintza zabala zuten Basque Wine Bar izeneko barrak instalatu ziren. Urriaren 10ean, museoaren patronatuak Euskadiko kalitateko produktuekin egindako otordua dastatu ahal izan zuen, bai eta Arabako Errioxako ardoa, Txakolina eta Euskal Sagardoa ere. Azkenik, gaur 120 lagunek gozatuko ahalko dute Basque Brunch batez, eta Basque Wine edarien 3 dastaketa komentatutan hartu ahalko dute parte, Mikel Garaizabal enologoaren eskutik.

Urriaren 22an eta 23an ere, Euskadiko gastronomia eta enologia bertan izango dira; izan ere, ostiralean, festa bat egingo dute aire zabalean 100 lagunentzat eta, larunbatean, Basque Grill Córner bat. Azken ekintza hori izango da jendetsuena, 1350 lagun bertaratuko baitira.

 Basque Wine

Basque Wine Euskadiko edarien eta upategien sektorea bultzatzeko sustapen‑marka berri bat da, eta honako edari hauek babesten ditu: Errioxa JDBa duen ardoa (Euskal Autonomia Erkidegoan botilatua eta Eskualdeko Ardoa, Udalerriko Ardoa edo Arabako Errioxako Mahasti Berezia etiketa duena); “Basque Beer” artisau-garagardoen marka kolektiboko garagardoak; “Txakoli de Álava-Arabako Txakolina”, “Bizkaiko Txakolina-Txakoli de Bizkaia”, “Txakoli de Getaria-Getariako Txakolina” JDek babesten dituzten txakolinak; eta, “Euskal Sagardoa- Sidra Natural del País Vasco” jatorri-deitura duten sagardoak.

Ekintza hori Euskadiko edarien sektorea babesteko, sustapen- eta kontsumo‑kanalak indartzeko eta euskal upategietako produktuen kokapena indartzeko lankidetza publiko-pribatuko estrategia baten barruan sartzen da.

 

Gure arrainaz maitemintzeko kanpaina

Eusko Jaurlaritzak, HAZI-ren bidez, Euskadin arrainaren kontsumoa sustatzeko kanpaina jarri du abian, horrek osasunerako dituen onurak jakinaraziz eta gure arrandegietan erostera animatuz eta, horrela, bertako ekonomiaren garapena bultzatuz.

Kanpaina urrian ikusi ahal izango da, eta modu dibertigarri, desberdin eta dotorean erakusten du gure arrainek kontsumitzaileekin duten maitasun-harremana. Erlazio hori arrandegietan hasten da, maitasun-ziztada sortzen den lekuan.

Gure arraina hain da erakargarria zaporeagatik, kalitateagatik eta osasunerako onurengatik, non ondo ezagutzen duen edonor maiteminduko baita. Jatekoak daude!

 

Proba itzazu errezeta erraz hauek eta maitemindu zaitez:

Arrandegia bazara eta arrain-kontsumoa sustatu nahi baduzu, deskargatu kartelak eta jarri zure dendan:

ANAREN KARTELA

KOLDOREN KARTELA

Euskadiko arraindegietako ohiko arrainak

scribdicon

HAZI. Egoitza Nagusia. Granja modeloa z/g 01192 Arkauti, Araba. IFK. G48986137  l T 945 00 32 40 | hazi@hazi.eus | Pribatutasun Politika | Ohar Legala | Urrutiko Kontrola